حاجاولي ما جاوني
غير بالصبر، ما بقا قد ما فات
2010 تكون لحالة تبدلات
نسا لكلام لقديم
نسا "قولوا لعام زين"
غتولي بصح بوغوص(beaugosse)
ولاعلأقل زوين
تصحاح و تدير لاباس
تعاود فلاكاص (la casse)
و المردة بلاصت للراس
يولي معاك حنين
و داز عام مورا عام
فقت صباح لقيتها جات
مشيت طليت على مرايتي
مازال ما تنقات
الزين ما بانو حروفوا
و من الصحة غير لا فانت (la feinte)
حاجاولي ما جاوني
بالملاين سياحنا و بلا قزدير ديورنا
و عندنا كاس العالم
و داز عام مورا عام
السياح جاوا و مشاو
و يحسبوا فلياليهوم
غير شوية نساو
باللي كحل الراس فيهم........كثر من لماريكان
الديور تبناو
و بالسوارت سدوا عليهم
ماشي ديالك, .دمواليهم
و مشاو هدمو البراكة...و نساو الكاريان
و جا كاس العالم
من بعد ما دارو عرام
قاليك غير عكس فيهم
والله ما لعاب
و الله ما حرام
حاجاولي ما جاوني
التعبير يولي حرية، الثقافة تولي شعبية
ولي فكر مايتلام
و داز عام مورا عام
درنا الصحافة عروسة
و جلسنا نتسناو الهدية
ما عطاونا غالغرامة
(Estafette) و صتافيت عمارية
ومن الحرية غير الشان
كانت فلأول نايضة
رجعات بلدية
كلها يحنقز بالراية
و يقول لبلاد مزية
بلا سباب بلا ميزان
و داز عام مورا عام
ماكاين لا هدرة لا كلام
لغيتارست ولا شيطان
من التعبيرغير نعم
كي الملحمة د زمان
حاجاولي ما جاوني
نأسسو ديمقراطية، نقضيوا علمحسوبية
و نتهلاوا فالمال العام
و داز عام مورا عام
القدام درناه اللور
و بدلنا القليل ب شوية
العودان ولا تراكتور
و الناس هي هي
التدويرة مازال تدور
غير الخضرة ولات قرفية
القهيوة ولات فطور
و تلقا كاع الأمور
بإذن الله مقضية
و داز عام مورا عام
الصمعة مازال موجودة
و الديور هي اللي ركام
و القنبة معقودة
و انت هو الحجام
